kuch dino baad...

Dopahar ka waqt tha।

Adhikrit hall mein baitha hisaab-kitaab dekh raha tha।

Table par bahi-khate khule pade the।

Tabhi naukar andar aaya।

Uske haath mein ek saada sa lifafa tha।

"Malik, yeh aapke naam aaya hai."

Adhikrit ne bina zyada dhyaan diye lifafa le liya।

Use laga shayad kisi vyapaari ya rishtedaar ki chitthi hogi।

Usne bahi-khata ek taraf sarakaya aur lifafa khol diya।

Jaise hi andar se muda hua kagaz nikla, uski nazar neeche likhe naam par padi।

— Anshi

Adhikrit ki ungliyan ek pal ke liye ruk gayin।

Uske chehre par turant sakhti aa gayi।

Ek pal ke liye uska mann hua ki bina padhe hi chitthi ke tukde-tukde karke kachre mein phek de।

Lekin....

Uski ungliyan kagaz phaadne se pehle hi ruk gayin।

Adhikrit ne gehri saans li।

Phir na jaane kis soch mein usne chitthi khol li।

Uski nazar pehli line par padi।

Adhikrit ji,

Mujhe nahi pata ki aap yeh chitthi padhoge bhi ya nahi।

Aur agar padhoge to shayad poori padhoge bhi ya nahi।

Lekin aaj main bahut majboor hokar likh rahi hoon।

Main apne liye nahi likh rahi।

Main apne maa-papa ke liye likh rahi hoon।

Jab se main yahan aayi hoon, maine apne maa-papa ko roz thoda-thoda toot te dekha hai।

Papa pehle jaise nahi rahe।

Woh ghar se bahar nikalne se darte hain।

Mohalle wale jab bhi mere baare mein poochte hain, unka chehra jhuk jaata hai।

Maa roz raat ko chupchaap roti hain।

Aur mujhe lagta hai ki unki har aansu ki wajah main hoon।

Adhikrit ji, main unki iklauti beti hoon.

Unhone mujhe bahut pyaar se pala hai.

Aaj meri wajah se woh dono itna dukh seh rahe hain ki mujhse dekha nahi jaata.

Mujhe apni khushi nahi chahiye.

Mujhe apna adhikar nahi chahiye.

Mujhe aapse koi shikayat bhi nahi hai.

Bas ek binti hai...

Mujhe apne saath le jaiye.

Adhikrit ji, main sach keh rahi hoon...

Main yeh sab aur nahi dekh paa rahi।

Agar mujhse koi galti hui ho to uski saza mujhe dijiye।

Lekin mere maa-papa ko mat dijiye।

Unhone poori zindagi mujhe pyaar se pala hai।

Unki itni badi saza mat baniye।

Aap jo khana apne ghar ke naukar ko dete hain, wahi mujhe de dijiye.

Main kabhi shikayat nahi karungi.

Aapke itne bade ghar ke kisi chhote se kone mein padi rahungi.

Kisi ke saamne nahi aaungi.

Aapko kabhi pareshaan nahi karungi.

Bas itna kar dijiye ki mere maa-papa ko yeh tasalli mil jaye ki unki beti apne sasural mein hai.

Unhe logon ke sawaalon ka jawab na dena pade.

Unhe roz roz meri chinta mein ghulna na pade.

Adhikrit ji, jab maa mujhe dekhti hain na...

Toh woh muskurane ki koshish karti hain.

Lekin unki aankhon mein darr saaf dikhai deta hai.

Aur papa...

Papa mujhse nazrein chhupakar rote hain.

Main unki beti hoon.

Unka yeh haal mujhse nahi dekha jaata.

Agar aapko mujhse nafrat hai to kariye.

Main uska bhi bura nahi maanungi.

Lekin mere maa-papa ko saza mat dijiye.

Unka kya kasoor hai?

Kasoor agar kisi ka hai to mera hai.

Saza mujhe dijiye.

Par mere maa-papa ko aise roz roz marte huye mat dekhiye.

Main haath jodkar vinati karti hoon...

Please mujhe le jaiye.

Main aapse kuch nahi maangungi.

Na pyaar.

Na izzat.

Na patni ka adhikar.

Bas itni jagah de dijiye ki main aapke ghar ke kisi kone mein saans le sakun aur mere maa-papa ko yeh sukoon mil jaye ki unki beti apne ghar pahunch gayi hai.

Aapka jo bhi faisla hoga, main maan lungi.

— Anshi

Chitthi ke aakhri shabdon par aansuon ke boond gire huye the. Kuch akshar dhundhle pad chuke the, jaise kagaz bhi Anshi ki bebasi ko apne andar samet kar ro pada ho.

Chitthi khatam hote hi kamre mein gehra sannata chha gaya।

Adhikrit kuch der tak kagaz ko dekhta raha।

Uski nazar un dhundhle aksharon par tik gayi jo aansuon se phail gaye the।

Ek aam insaan shayad is chitthi ko padhkar pighal jaata।

Shayad use Anshi par taras aa jaata।

Lekin Adhikrit ke chehre par taras ka ek bhi nishaan nahi tha।

Usne dheere se chitthi modhi aur sofe par peeth tikakar baith gaya।

Uski aankhen saamne deewar par tiki hui thi।

Aur phir...

Uske honton par bahut halki si muskaan aa gayi।

Ek aisi muskaan jo kisi ko bhi bechain kar de।

"Toh itni majboor ho gayi hai...tu"

jo mujhse bheekh maang rahi hai

Usne dheere se khud se kaha।

Arre meri Janemaan ...itna bhi bura nahi hoo me ....

Agli subah...

Anshi ke ghar mein hamesha ki tarah sannata tha।

Uske papa baramde mein chupchaap baithe the।

Haath mein akhbaar tha, lekin nazrein us par nahi tik rahi thi।

Maa rasoi mein thi, magar unka mann bhi kahin aur hi tha।

Aur Anshi...

Apne kamre ke kone mein baithi khidki ke bahar dekh rahi thi।

chitthi bhejne ke baad bhi use koi umeed nahi thi।

Use lagta tha shayad Adhikrit ne chitthi padhi bhi nahi hogi।

Tabhi bahar se gaadi rukne ki awaaz aayi।

Ghar mein kisi ne dhyaan nahi diya।

Lekin agle hi pal darwaze par dastak hui।

Anshi ke papa uthkar darwaza kholne gaye।

Darwaza khulte hi unke chehre ka rang udd gaya।

Saamne Adhikrit khada tha।

Safed shirt।

Sakht chehra।

Aur wahi thandi nazrein।

"D-Damaad ji  Aap...?"

"K-kya baat hai beta...?"

Anshi ke papa ne hichkichate hue poocha।

Adhikrit ne seedha jawab diya।

"Anshi kahan hai?"

Uski awaaz sunkar andar baithi Anshi bhi chonk gayi।

Maa rasoi se bahar aa gayin।

Poore ghar mein ekdum sannata chha gaya।

Adhikrit ne ghar ke andar kadam rakha।

Phir bina kisi bhumika ke bola—

"Samaan baandh apna."

Kamre mein jaise waqt tham gaya।

Anshi ne socha shayad usne galat suna hai।

Uski maa bhi use dekhne lagiं।

Adhikrit ne phir wahi baat dohrayi।

Is baar aur saaf shabdon mein।

"Samaan baandh. Ghar chal."

Anshi ki saansen ruk si gayin।

Uski aankhen phat gayin।

Woh kuch bol hi nahi paayi।

Uske papa ne dheere se poocha—

"Matlab... aap Anshi ko lene aaye hain?"

Adhikrit ne sirf ek baar unki taraf dekha।

"Haan."

Bas ek shabd।

Lekin us ek shabd ne poore ghar ka mahaul badal diya।

Anshi ki maa ki aankhon mein turant aansu bhar aaye।

Unhone apna muh haath se dhak liya।

Shayad mahino baad unhe sukoon ki ek kiran nazar aayi thi।

Anshi ab bhi wahi khadi thi।

Jaise uske pair zameen mein gad gaye hon।

Adhikrit ki nazar us par padi।

"Khadi kya hai?"

Uski awaaz mein hamesha wali sakhti thi।

"Ja. Samaan baandh."

Anshi ki aankhon mein paani bhar aaya।

Lekin usne sir jhukaya aur chupchaap apne kamre ki taraf chal di।

Kamre mein pahunchte hi uske haath kaampne lage।

Purani attachee nikaalte waqt uski ungliyan baar-baar fisal rahi thi।

Use samajh nahi aa raha tha ki roye...

ya khush ho।

Bahar baithak mein...

Anshi ke papa baar-baar Adhikrit ka shukriya ada karne ki koshish kar rahe the।

Lekin Adhikrit zyada baat nahi kar raha tha।

Uski nazar kabhi darwaze par jaati...

kabhi seedhiyon par।

Jaise woh bas Anshi ka intezar kar raha ho।

Kuch der baad...

Anshi apni chhoti si attachee lekar bahar aayi।

Uski aankhen laal thi।

Maa use dekhte hi gale lagkar ro padiं।

Papa ne bhi muh pher liya।

Unki aankhon mein bhi nami aa chuki thi।

Anshi ne dono ke pair chhuye।

Usne ek nazar apne ghar par daali।

Aur  Adhikrit seedha darwaze ki taraf badh gaya।

"Chaal."

Bas itna hi kaha।

Anshi ne dheere se Adhikrit ki taraf dekha।

Anshi ne apni attachee uthai।

Aur ek aakhri baar apne maa-papa ko dekha।

Unke chehron par dard bhi tha...

aur sukoon bhi।

Phir woh chupchaap Adhikrit ke peeche chal padi।

Darwaza band hua।

Aur gaadi dheere-dheere gali se bahar nikal gayi।

Shaam dhalne lagi thi jab jeep Adhikrit ke ghar ke bahar aakar ruki।

Poore raste Anshi ne ek shabd nahi kaha tha।

Jeep rukte hi Anshi ki saansein tez ho gayin।

Usne dheere se nazar uthakar ghar ki taraf dekha।

Yahi ghar...

Jahan se woh ek mahine pehle aansuon mein doobi hui nikli thi।

Aur aaj...

Wapas aa rahi thi।

Lekin bahu bankar nahi।

Jaise kisi par ehsaan karke rakha ja raha ho।

Adhikrit bina kuch kahe jeep se utar gaya।

Anshi kuch pal wahi baithi rahi।

Uske haath kaanp rahe the।

Tabhi Adhikrit ki sakht awaaz aayi।

"Utaro."

Anshi jhatke se hosh mein aayi।

Usne apni attachee uthayiaur dheere se jeep se neeche utar gayi।

Darwaze par Joti pehle se khadi thi।

Uske chehre par koi khushi nahi thi।

Koi apnapan nahi tha।

Sirf thandi nazrein।

Anshi ne sahmi hui nazron se unki taraf dekha।

Phir dheere se jhukkar pair chhoone lagi।

Lekin Joti ek kadam peeche hat gayi।

Anshi ka haath hawa mein hi ruk gaya।

Uska dil ek baar phir toot gaya।

"Yaad rakhna," Joti thandi awaaz mein boli, "tujhe yahan humne sirf Adhikrit ke kehne par aane diya hai."

Anshi ki palken jhuk gayin।

Usne dheere se sir hila diya।

Tai ji bhi aangan mein khadi thi।

Unhone Anshi ko dekha।

Ek mahine mein hi uska chehra kitna badal gaya tha।

Gaal dhans gaye the।

Aankhon ke neeche kaale ghere pad gaye the।

Aur chehre par hamesha rehne wali sharmili muskaan poori tarah gaayab thi।

Tai ji ka dil bhar aaya।

Lekin us waqt woh bhi kuch nahi boliं।

Anshi ne dheere se ghar ke andar kadam rakha।

Uska dil zor-zor se dhadak raha tha।

Har deewar...

Har kona...

Use us din ki yaad dila raha tha।

Jab use sabke saamne thukraya gaya tha।

Tabhi Adhikrit ki awaaz phir sunai di।

"Apna samaan lekar upar chaal."

Anshi ne turant attachee uthayi।

Aur chupchaap seedhiyon ki taraf badh gayi।

Uski aankhon mein aansu bhar aaye the।

Lekin usne unhe girne nahi diya।

Kyuki usse yaad tha—

Woh yahan apne liye nahi aayi hai।

Woh sirf apne maa-papa ki jhuki hui nazrein aur izzat bachane ke liye wapas aayi hai।

Anshi almari ke saamne khadi apna samaan laga rahi thi।

Uske paas waise bhi zyada kuch nahi tha।

Uske haath dheere-dheere chal rahe the।

Dil ab bhi ghabraya hua tha।

Har awaaz par woh chonk jaati thi।

Tabhi kamre ka darwaza khula।

Anshi ka haath wahi ruk gaya।

Usne dheere se mudkar dekha।

Adhikrit andar aa chuka tha।

Usne aakar darwaza band kar diya।

Kamre ki khamoshi aur gehri ho gayi।

Anshi ka gala sookh gaya।

Woh almari ke paas hi khadi rahi।

Adhikrit kuch pal tak bina kuch kahe use dekhta raha।

Phir dheere-dheere uski taraf badhne laga।

Anshi ka dil zor-zor se dhadakne laga।

Dono ke beech ki doori kam hone lagi।

Anshi ne sahaj roop se ek kadam peeche hatna chaha।

Lekin uski peeth almari se takra gayi।

Ab peeche hatne ki jagah bhi nahi bachi thi।

Uski ungliyan saari ke pallu ko kas kar pakad chuki thi।

Adhikrit uske saamne aakar ruk gaya।

Anshi ne dheere se nazar utha kar uski taraf dekha।

Uski aankhon mein saaf darr tha।

"Yaad hai na tujhe?"

Uski awaaz dheemi thi।

"Tu kis shart par wapas aayi hai."

Anshi ki palken jhuk gayin।

Usne dheere se sir hila diya।

Adhikrit kuch pal use dekhta raha।